Носир Мавлонов: Тумандан жаҳон чемпионлари чиқадиган вақт келди

Тумандаги Мирзо Улуғбек маҳалласида яшовчи Азимжон Ҳожиев болалигидан спортга ошно тутинган. У 11 ёшга тўлган вақтда оила аъзолари Самарқанд ихтисослаштирилган олимпия захиралари мактаб-интернатига олиб боради. Азимжоннинг спортга бўлган интилиши ва қизиқишини кўрган Акобир Усмонов унга устозлик қилади.
Туман ҳокими Носир Мавлонов жорий йилнинг 18-28 октябрь кунлари Жанубий Кореянинг Пхеньян шаҳрида ўтказилган Осиё чемпионатида спортнинг оғир атлетика тури бўйича биринчи ўринни қўлга киритган Азимжоннинг онаси Дилфуза Абдунаимова ҳамда устози Акобир Усмонов билан учрашди.
Азимжон туманда жисмоний тарбия ва спортни оммалаштириш, оғир атлетика турини янада ривожлантиришда тенгдошларига ўрнак бўлаётганини эътироф этди. Ана шундай ёшларнинг етишиб чиқаётгани, уларни тарбиялашда ота-она ва устозларнинг ўрни муҳим эканлиги, тумандан жаҳон чемпионлари чиқадиган вақт келганлигини таъкидлади. Бўлиб ўтган халқаро мусобақада 3 та олтин медални қўлга киритгани учун Азимжоннинг онасига ташаккурнома топширди.
- Азимжонга 11 ёшидан устозлик қиламан, - дейди А.Усмонов. - Яқинда ўтказилган Осиё чемпионатида оғир атлетика бўйича 146 килограмм вазнни даст кўтариб, олтин медаль соҳиби бўлди. Шунингдек, силтаб кўтариш бўйича 185 килограмм вазнни ўзига бўйсиндириб биринчи ўриннни қўлга киритди. Икки кураш натижаси бўйича ҳам олтин медаль соҳибига айланди. Бундай шогирдим борлигидан фахрланаман.
Учрашув давомида туман ҳокими декабрь ойида Қатарда ўтказиладиган Олимпияда йўлланмасини берувчи Гран-при мусобақасида муваффақиятли иштирок этиб, юртимиз байроғини баланд кўтаришига умид билдирди.
Айни вақтда Самарқанд давлат университети жисмоний маданият факультети талабаси бўлган Азимжон олдиндаги халқаро мусобақага тайёргарлик кўрмоқда.