Samarqand viloyatining yoshlar siyosati, ijtimoiy rivojlantirish va ma’naviy-ma’rifiy ishlar bo‘yicha hokim o‘rinbosari X.M.To‘xtayev, viloyat sog‘liqni saqlash boshqarmasi boshlig‘i S.Zayniyev hamda Samarqand tuman hokimining o‘rinbosari G‘.Boboxolov ishtirokida Samarqand tuman tibbiyot birlashmasi faoliyati va amalga oshirilayotgan ishlar yuzasidan yig‘ilish o‘tkazildi.

Tadbir davomida tumanda onalik va bolalikni muhofaza qilish, yuqori texnologik tibbiy amaliyotlarni joriy etish, shuningdek, aholiga birlamchi va stasionar tibbiy xizmat ko‘rsatish borasidagi mavjud kamchiliklar muhokama qilindi.

Ma’lumotlarga ko‘ra, 2024-yilning 6 oyi mobaynida dispanser nazoratida turgan bemorlar soni 40 474 nafarni tashkil etgan bo‘lsa, joriy yilning shu davrida bu ko‘rsatkich 43 365 nafarga yetib, o‘tgan yilga nisbatan 2 891 nafarga yoki 7,1 foizga oshgan.

Xususan:

Endokrinologik kasalliklar – 1 495 nafarni tashkil etib, o‘tgan yilga nisbatan 140 nafarga (10,3 foizga) ko‘paygan;

Birlamchi xavfli o‘sma kasalliklari – 118 nafarni tashkil etib, o‘tgan yilga nisbatan 23 nafarga (24,2 foizga) oshgan;

Qon aylanish tizimi kasalliklari – 8 974 nafarni tashkil etib, o‘tgan yilga nisbatan 482 nafarga (5,6 foizga) ortgan;

Nafas olish a’zolari kasalliklari – 15 925 nafarni tashkil etib, o‘tgan yilga nisbatan 1 565 nafarga (10,8 foizga) ko‘paygan.

Shu munosabat bilan yig‘ilishda mas’ul xodimlarga aholiga sog‘lom turmush tarzini keng targ‘ib qilish, profilaktik ko‘riklarni samarali tashkil etish, tibbiy xizmat sifatini oshirish hamda mavjud muammolarni bartaraf etish yuzasidan aniq topshiriq va ko‘rsatmalar berildi.

Viloyat hokimining o‘rinbosari X.M.To‘xtayev yig‘ilishda shunday ta’kidladi:
"Aholi salomatligi – bu bizning eng katta boyligimizdir. Tibbiy xizmat sifati, profilaktika va sog‘lom turmush tarzini keng targ‘ib qilish borasidagi ishlar samaradorligi bevosita odamlar hayotiga ta’sir qiladi. Shu bois, tibbiyot birlashmasi oldiga qo‘yilgan vazifalar har bir mutaxassisning kunlik faoliyatida ustuvor bo‘lishi shart."

Shuningdek, tuman hokimining o‘rinbosari G‘.Boboxolov mahalliy darajada amalga oshirilayotgan chora-tadbirlarni kuchaytirish, aholining tibbiy madaniyatini oshirish va joylarda targ‘ibot-tashviqot ishlarini tizimli yo‘lga qo‘yish zarurligini alohida ta’kidladi.

Viloyat sog‘liqni saqlash boshqarmasi boshlig‘i S.Zayniyev esa so‘zida:
"Bugun nafaqat davolash, balki kasalliklarning oldini olish choralarini kuchaytirish eng dolzarb masaladir. Shu maqsadda zamonaviy texnologiyalarni joriy etish, tibbiyot xodimlari malakasini oshirish va birlamchi bo‘g‘inda samarali xizmatni yo‘lga qo‘yish bizning asosiy vazifamizdir. Bu borada Samarqand tumanida yetarlicha imkoniyat va resurslar mavjud," – deya qayd etdi.